حكاية #هديل التي راحت #ضحية خطأ طبي #ببورسعيد
حكاية #هديل التي راحت #ضحية خطأ طبي #ببورسعيد
الرواية جاءت علي لسان الزوج المكلوم..
#انا_عايز_حق_هديل
هديل عندها 30سنة وام لطفلين وحامل فى طفلها التالت تابعت مع الدكتوره سيده عيسى راحت لها ف التاسع
وكانت لسه ماخدتش حقنه اكتمال الرئه
قالت للدكتوره على الحقنه الدكتوره قالتلها مش مهم
انتى خلاص ف التاسع ومينفعش تتاخد
مع العلم أن الحقنه بتتاخد لو قبل الولاده ب24 ساعه المهم مخدتش الحقنه
وحددت لها معاد ولاده يوم الاتنين 6/6 الساعه 7صباحا فى مستشفى دار الشفاء ببورسعيد
هديل راحت فى معادها
والدكتوره قامت ب عمليه ولاده قيصريه
اول شي الطفل نزل الرئه الشمال غير مكتملة وتحول على الحضانه فى ساعتها ويدوب هديل شافته كده من بعيد
هديل خرجت من العمليه غير متزنه قولنا عادى تأثير والولاده
لكن هى قالت لا انا ولدت مرتين قبل كده وده مش نفس الوجع انا فيا حاجه!!
وهنا كان النزيف شديد كميه دم غير طبيعيه بتنزل
والدكتوره كل اللى عليها تدوس على بطنها وهديل تصرخ
مامتها قالتها يا دكتوره لو بنتى فيها حاجه قولى نلحقها من دلوقتى.. الدكتوره زعقة لها وقالتها بنتك سليمه يا ماما انتى هتفهمينى شغلى.. مامت هديل قالت لها انا اسفه يا دكتوره
الدكتوره سابت هديل وروحت جابت جهاز السونار
وعملت لها اشاعه وقالت لها كل حاجه تمام مفكيش حاجه وسأبتها وروحت.. هديل فضلت على حالتها لمده 28ساعه
تانى يوم الصبح لقينا الدكتوره طالبه الإسعاف
ومحولاها على مستشفى النساء
هديل دخلت مستشفى النساء والدكتوره كانت معانا
هى اللى محولاها
سلمت الحاله وعملولها فحص شامل
بعد الفحص خرجت الدكتوره #سيده_عيسى
وقالتلى هما هيطلبو منك دم دلوقتى وهيقولولك على كام حاجه كده ومشيت ومشوفنهاش تانى خالص
خرجوا الدكاتره قالو لى محتاجين دم ضرورى
4كياس دم و3بلازما وممكن نحتاج دم تانى لاننا لازم نعمل عمليه دلوقتى حالا لان هديل عندها نزيف شديد وعايزين نعرف السبب بس العمليه خطيره ولازم تمضى على إقرار
المهم جبت 8 اكياس دم وهديل دخلت العمليات وخرجت بعد كام ساعه على العنايه المركزه.. سالت الدكتور عن العمليه
قالى بصراحه الوضع حرج جدا احنا عملنا اللى نقدر عليه والباقى ده بتاع ربنا... خير يا دكتور ايه سبب النزيف
قالى البطن كان فيها كميه دم كبيره وبعض الجلطات الدمويه
نتيجه قطع شريان فى جدار البطن
وده أدى لشبه توقف فى معظم اجهزه الجسم مع فشل كلوي حاد.... طيب فى امل يا دكتور
قالى بصراحه كل يوم بيعدى عليها بيزود نسبه الامل
ولكن مقدرش اطمنك احنا عملنا اللى ممكن يتعمل وما باقى إلا اراده الله... هديل قعدت يوم ف العنايه المركزه
وتانى يوم الصبح الساعه 6صباحا هديل اتحولت على عنايه الكلى بمستشفى_المبره لعمل جلسه غسيل كلوي ضرورى لأن الوضع بقى فى غايه الخطوره
هديل غسلت اول غسله بعد صعوبه ووضعها على اجهزه اكسجين وكام جهاذ كده معرفش اسمهم
الدكاتره طلبو مننا صفائح دم اى كميه ممكنه
جبنالها 42 صفيحه وهديل قعدت يوم ف عنايه الكلى وتانى يوم اتوفت.... هديل ماتت وسابتلى 3 اطفال 5سنين و3 سنين
والطفل اللى ف الحضانه اللى مشفتهوش ولا شافها
#انا_عايز_حق_هديل
التعليقات على الموضوع