العجل ده مفقود اول يوم العيد ... و دي صورته
سبحانه وتعالى فعال لما يريد 👇
العجل ده مفقود اول يوم العيد ... و دي صورته
الحكايه ابتدت اني طلبت توصيل عجل علي دار رعايه بنحب البنات الايتام اللي فيها و بيساعدونا كل سنه في تقطيع اللحمه و توزيعها علي محتاجين بشكل محترم و جميل.
العجل بيني و بين صديق عمري بالنص و اتفقت انا وهو ان هو اللي هيقف علي الذبح عشان انا مش هكون موجود و هيروح هو صباح اول يوم العيد يقف علي الذبح.
بعتت للشركه العنوان و Google location و كمان رقم تليفون منفصل للتواصل مع مديرة الدار ... و الشركه طمنتني الساعه ٢ الفجر يوم الوقفه ان العجل خلاص تمام في الدار.
تاني يوم صديقي راح يذبح بالجزارين و الأكياس و مجهزين نفسهم و كله تمام ... العجل فين يا جماعه اللي هنذبحه !
ده مفيش عجل ... العجل مجاش !
صاحبي اتجنن .. دا انا جايب الأكياس و الجزارين !!
كلمني صاحبي صحاني من النوم مفزوع ... فين العجل يا رامي .. مفيش عجل في الدار ؟؟
ازاي ؟؟
كلمت صاحب المعلف اقوله إيه النصب ده ... فين العجل !!!
قالي يا فندم احنا وصلنا العجل المكان الصح زي ما حضرتك طلبت و تواصلنا مع الرقم اللي حضرتك بعتته و تأكدنا ان العجل وصل بالليل زي ما بلغنا حضرتك !
قولتله الناس بتقول مجاش حاجه و مفيش عجل في الدار !!
اتجنن و قالي يا فندم اهو الرقم اللي حضرتك باعته ... و بعتلي رقم انا معرفهوش و بيقولي ان انا اللي باعت الرقم ده مع ال location و بعتلي فعلا screen shot فيها الرقم فعلا موجود في ال location بس مش ده الرقم اللي انا اعرفه للدار .. انا باعت رقم تاني و مشوفتش ان الlocation فيه رقم اصلا!
و هنا كانت المفاجأه ... دي دار تانيه في المقطم انا لا اعرفها و لا سمعت عنها و لا اعرف الايتام اللي فيها.
فقولتله يا باشا دي نصابين انا معرفش مين دول ... قالي يا باشا نصابين مين، دي الاطفال فرحت اوي و السواق بيقولي ربنا يكرم الراجل اللي بعت العجل ده ... دي ناس فعلا غلابه اوي اوي و فرحوا اوي و مكانوش مصدقين نفسهم !! متقولش عليهم نصابين بعد إذنك.
صدمه رهيبه ... مش عارف اقول لصاحبي ايه !! اقوله العجل اتسرق !! مين الناس دي !! انا بحلم !!
صاحب المعلف قالي يا باشا حضرتك زعلان ليه ... خلاص انا هاخد الثواب بتاع العجل ده ... العجل ده راح مكانه الصح و القصه دي لو اتكررت ١٠٠ مره مستحيل الموضوع ده يحصل بالغلط ... ربنا باعت العجل ده للايتام دي ... العجل ده راح للمكان الصح ... اعتبره بتاعنا و هنبعتلك عجل تاني حالا ... متزعلش ... احنا متأكدين ان العجل ده بتاعهم و العجل بتاع حضرتك اعتبره قي الطريق لحضرتك.
قفلت التليفون مش مصدق رده ... فعلا العجل ده راح لأصحابه بجد ... العجل ده مش بتاع الدار الاولي ... ده نصيب الايتام اللي معرفهومش .. العجل في مكانه الصح.
رجعت لصاحبي قولتله خلاص في عجل في الطريق و متزعلش ... و حكيتله الحكايه.
صاحبي اتجنن و قالي لا يا باشا ... انا شريك في العجل التاني مليش دعوه ... هدفع في التاني و هدفع في الجديد ... انا شريك في الخير الكبير ده ... اسف حقي و مش هسيبه !
العجل الاول طلع راح مكانه الصح للناس اللي محتاجاه ... و العجل التاني كمان وصل و الايتام التانيين كمان عملوا اكياس التوزيع و نزلوا يوزعوها و اتبسطوا.
المعلف مملوك لشركه Farm House اللي لحد دلوقت مش عارفين نقنعهم ياخدوا فلوس العجل الاولاني ... و مش هكتب اسم دار الرعايه لاني معرفهوش ولا حتي كلمتهم و لا هكلمهم ... رقم التليفون اللي بسببه راح العجل لمكانه الصح مكتوب في الصوره لان اكيد ربنا له حكمه ان كل ده يحصل ... كلموهم انتوا يمكن يكونوا لسه محتاجين حاجه و انا متأكد ان الناس دي كويسين.
و دي صورة العجل الحقيقه ... و سبحان مدبر الملكوت
http://alihassanpress.blogspot.com
youtube.com/channel/UCjk5PeU4Ghb5ocz0JgESu2w
التعليقات على الموضوع