نساء في حياة الظباط الاحرار | الجزء الثاني

 

بماذا انشغل الظباط الاحرار عن حل مشاكل مصر ؟

نساء في حياة الظباط الاحرار

علاقات نسائية وزيجات سرية!

رجال عبد الناصر والوجه الأسود للسلطة!

اعداد / سارة سامي 

#غموض #علي_حسن #الجورنالجي #الظباط_الاحرار

• جواز عبد الحكيم عامر وبرلنتي عبد الحميد فتح الباب ع مصرعيه امام رجال المشير اللي لاقوها فرصه للوصول لنزواتهم النسائية بدون خوف تحت مظلة قائدهم

• أعمالا بمقولة اذا كان رب البيت بالدف ضارب فشيمة اهل البيت.. الرقص!! 

• فقرر على شفيق مدير مكتب المشير ومستشاره العسكري ان يحذو حذو رئيسه واتعرف ع الممثله مها صبري..

• اختلف الكتاب ع طريقة التعارف بينهم البعض قال انهم اتقابلوا اول مره في اسكندريه في عيد ميلاد الفنان أحمد رمزي ونشات بينهم صداقه 

• والبعض الاخر قال ان التعارف بينهم حصل في بورسعيد لما كانت مها صبري بتحيي حفل عيد النصر هناك وقابلت على شفيق وطلبت منه انه يحللها مشكلة واحد من قرايبها في التجنيد 

• ومن هنا اتعمقت العلاقه بينهم.. وطلب منها الجواز بعد فتره قليله من التعارف والصداقه وافقت لكن بشرط انه يطلق زوجته الأولى سوزي صدقي بنت الفنان حسين صدقي 

• وهو وافق بشرط انها تعتزل الفن وحصل الجواز اللي استمر لحد مااتقتل على شفيق في لندن سنة ١٩٧٧.. 

• وفي واحده من إفيهات استغلال رجال عبد الناصر لنفوذهم وسلطاتهم هي حكاية على شفيق اللي قرر منح زوجته مها صبري ووالدتها وعمها سيارات اخر موديل 

• في الوقت اللي كان حصول المصري على سياره امر غايه في الصعوبة وبيستلزم حصوله ع تراخيص كتير حتى ان الوزراء نفسهم كانوا بيركبوا سيارات نصر ٢٣٠٠ متواضعه.. 

• وطبعا بعد نكسة ٦٧ كان مصير على شفيق نفس مصير كل رجال المشير وهو المحاكمه والسجن وده خلي مها صبري عاشت حياه صعبه ماديا 

• خاصة بعد مااتمنعت من الغني في الاذاعه بأمر من عبد الناصر لدرجة انه يقال انها لجأت لام كلثوم عشان ترجع تغني ولو في حفلات صغيره بعد سنين من الاعتزال.. 

•

وفضلت مها صبري تزور زوجها على شفيق في السجن وتدعمه طول سنين سجنه وبعد خروجه من السجن عاني من تدهور حالته الماديه وطلب من عبد الناصر بشكل شخصي انه يسمح لمراته انها ترجع تغني في الاذاعه تاني 

• لكن عبد الناصر رفض تماما وده خلاه يقرر الهروب من مصر مع زوجته بعد ماتعرض عليها تغني في نايت كلوب في لندن 

• فسافروا مع بعض وعاشوا هناك واستغل على شفيق علاقاته العسكرية وخبرات السابقه من خلال عمله في الجيش واشتغل في تجارة السلاح في لندن لحد مااتقتل في ظروف غامضه ومقدرتش الشرطة الانجليزيه توصل للقاتل..

• رجل اخر من رجال المشير ودراعه اليمين وسكرتيره الخاص وهو عبد المنعم ابو زيد والمعروف بظل المشير

• سنة ١٩٦٥ شاف أبوزيد الممثله سهير فخري لأول مره وانبهر بجمالها وحبها وكانت بدأت خطوات تألقها في السينما.. 

• فقرر انه يتجوزها لكنه اتفاجئ انها متجوزه من السيناريست والكاتب الروائي الكبير محمد كامل حسن اللي كان أكبر منها ب٢٥ سنه ومخلفه منه طفلين..

• فيعمل ايه أبوزيد عشان يوصل للفاتنه سهير فخري..؟؟! 

• استخدم أبوزيد نفوذه في إيداع محمد كامل حسن مستشفى الأمراض العقليه وقعد فيها لمده ٤ سنين 

• رفعت فيهم سهير قضية طلاق ع زوجها وكسبتها واتطلقت واتجوزت أبوزيد وبعدت عن الاضواء ..

• وخرج بعدها محمد كامل حسن من مستشفى الأمراض العقليه وقرر الهرب للبنان ومرجعش مصر غير بعد القضاء ع مراكز القوي سنة ١٩٧١..

• المفارقه ان نهاية ابو زيد كانت ع ايد المشير نفسه بعد ماتهمته برلنتي انه سرق صوره شخصيه ليها مع المشير عشان ينشرها ويفضحهم قدام الرأي العام 

• فامر المشير باعتقاله وتعذيبه.. فعلا.. من أعمالكم سلط عليكم

• خرج بعدها أبوزيد من السجن لكن اتقبض عليه تاني بعد النكسه باعتباره واحد من رجال عبد الحكيم عامر..

• وجيه اباظه وليلى مراد.. وإنخراط الفن بالسياسة

• بعد طلاق ليلى مراد من أنور وجدي وانتشار الإشاعات حواليها انها بتدعم اليهود وإسرائيل في السر

• وقعت ليلى مراد في مشاكل فنيه كتير كانت هتوصلها للاعتزال خصوصا بعد خروجها وانكارها الاشاعه ودعمها للجيش المصري والجيوش العربيه 

• لكن البعض مصدقهاش وتم منع إذاعة اغانيها وأعمالها الفنيه في سوريا وبدات تزيد ازماتها لحد ماظهر في حياتها وجيه اباظه 

• واحد من أبرز الوجوه في مجلس قيادة الثوره وطلب الجواز منها في السر  في مقابل حل ازمتها مع الشعب والسلطة وكان وقتها بيشغل منصب مدير إدارة الشئون المعنوية بالقوات المسلحة 

• وافقت ليلى ع العرض واصدر وجيه اباظه بيان رسمي نفي فيه سفر ليلى مراد لإسرائيل او دعمها لليهود باي شكل من الأشكال

• وعليه تم الغاء قرار منع إذاعة اغانيها وأعمالها الفنيه وطلب اباظه من سفارة مصر في سوريا ان تتدخل لتوضيح الصوره والغاء قرار المنع اللي فرضته سوريا 

• وعادت ليلى مراد للاضواء مره اخرى بعد فترة غياب طويلة..

• انتهى الجواز بينهم بعد سنه واحده   وأثمر عن طفل وحيد اسمه أشرف.. واستمر وجيه أباظة في مواقعه الرفيعة لحد مأُطيح به خلال أزمة مراكز القوى اللي اندلعت في عهد الرئيس أنور السادات سنة ١٩٧١..

• واخيراا أشهر العلاقات جدلا وابرزها اعلاميا هي علاقة الزواج اللي تمت بين صلاح نصر رئيس المخابرات والممثله والمنتجه اعتماد خورشيد

• وحسب شهادة اعتماد خورشيد في مذكراتها (شاهده ع انحرافات صلاح نصر) اللي قالت فيها ان صلاح نصر حبها اول ماشافها وقرر انه يتجوزها رغم علمه انها متجوزه من المنتج احمد خورشيد وحامل منه.. 

• فهدد صلاح نصر زوجها انه لو مطلقهاش هيدخله مستشفى الأمراض العقليه

• فوافق جوزها واجبر ع تطليقها وخلاه يشهد كمان ع عقد جوازهم

• وفي خلال سنوات الجواز كانت اعتماد خورشيد بتشوف كل التجاوزات اللي كانت بتحصل باسم القانون واستغلال السلطه والنفوذ لرجل المخابرات الاشهر صلاح نصر

• وبعد وفاته قامت بتأليف كتاب حول انحرافات صلاح نصر تكشف فيه الممارسات الشاذة لمدير جهاز المخابرات 

• وعلاقاته المشبوهة مع نجمات السينما المصرية واستغلاله ليهم في نشاطات استخباراتية.