حكاية شقة العفاريت في بورسعيد

 

حكاية شقة العفاريت في بورسعيد

اعداد/ سارة سامي

#الجورنالجي #غموض #علي_حسن

عملنا حلقات سابقه عن بعض الظواهر الغريبه اللي ثبت وجودها في الكون من خلال وقائع مسجله ولكن في نفس الوقت  فشل العلم انه يوجد لها تفسير وده بسبب خروج بعضها عن حدود المنطق.. زي حكاية النهارده اللي حصلت في بورسعيد من حوالي ٢٥ سنه تقريبا ومع ذلك مازالت لغز بيسكن في عقول واذهان كل اللي عاصر أحداثها.. 

طبعا كلنا سمعنا عن عمارة رشدي في اسكندرية.. المعروفه باسم عمارة العفاريت واللي خرجت منها حكايات كتير غريبه وعجيبه.. ومخيفه

 لحد مابقت أيقونة لحواديت الرعب في مصر.. لكن اللي مش كتير من الناس يعرفوه او فاكرينه ان حصلت في بورسعيد سنه ١٩٩٩ حادثه مشابهه كانت حديث الصحافه والإعلام وقتها.. واتعرفت اعلاميا باسم شقة العفاريت 

الحدوته بدأت في فجر ليله من ليالي سنة ١٩٩٩ لما صحي أهالي منطقة عمرو بن العاص في حي الزهور ببورسعيد ع صوت انفجار ضخم اتزامن مع رفع ادان الفجر بالظبط.. الانفجار حصل في العماره رقم ١١ داخل شقه سكنية في الدور التالت.. صوت الانفجار كان قوي جدا لدرجة انه سمع في أنحاء مدينة بورسعيد كلها وناس كتير اووي سمعته.. وطبعا الجيران وسكان المنطقه صحيوا مفزوعين ع الصوت

 لكن المفاجأه انهم اكتشفوا انه مش مجرد حادث عادي نتيجة إهمال او قضاء وقدر لكن كان واضح من شكل الشقه ان الحكاية أكبر من كده.. الحكاية ان الراجل اللي كان ساكن في الشقه واللي يقال انه كان مدرس وقع في ايده كتاب عن السحر وقرر انه يستخدمه في تحضير الجن ولما حضر الجن فشل انه يصرفه فاضطر انه يحبسه في الحمام لكن مع رفع اذان الفجر حصل الانفجار اللي كان مصاحب لعلامات غريبه ومخيفه جدا منها ان الحيطان اللي وقعت كانت كأنها مقصوصه بمنتهى الحرفيه او باستخدام مسطره وان آثار الردم والرتش الناتج عن وقوع الحيطان مكانتش موجوده في الشارع كأن الحيطان اختفت وازاز الشبابيك اللي تتطاير نتيجة الانفجار كان موجود ع بعد ٥٠ متر من الشقه.. حتى قاعدة التواليت بتاعت الحمام كانت في مكانها ومتاثرتش باي شكل من الأشكال رغم ان منبع الانفجار كان الحمام نفسه.

. أما شهادة شهود العيان من الجيران ساعتها اكدوا انهم لما دخلوا الشقه لاقوه كوباية ميه محطوطه ع التسريحه ومتحركتش من مكانها  وبعضهم قال ان كان فيه حيطه عليها كلمة الله مصابهاش اي تلف او تكسير.. ومن الامور اللي اثارت الريبه والخوف عند سكان المنطقه ان عمود النور الموجود قدام العماره اترفع لفوق بعد الانفجار وأصبح الكشاف مواجه لبلكونة الشقه رغم انه من الطبيعي أن بعد تاثره يتكسر ويقع لتحت.. حتى السلوك والمواسير المحيطه بالحمام فضلت زي ماهي وماصابهاش اي تلف.. ورغم ان صاحب الشقه زعم ان اللي حصل ده كان محض الصدفه وانه كان مجرد حب استطلاع الا ان الجيران اكدوا وقتها انه كان معروف عنه أعمال السحر والشعوذه..

 وبين يوم وليله أصبحت شقة العفاريت مزار سياحي بيجيلها يوميا مئات من البشر عشان يتفرجوا عليها ده غير الباعه الجائلين زي بياع الترمس وغزل البنات والذره وغيرها لدرجة ان سواقين الميكروباس عملوا خط مخصوص لشقة العفاريت.. ورغم محاولات الجهات المختصه وقتها تكذيب الموضوع وايهام الناس ان ده مجرد انفجار لانبوبة الغاز وان موضوع تحضير الجن ده مجرد اشاعات خصوصا بعد   ماتم اخلاء سبيل صاحب الشقة بعد التحقيق معاه.. لكن برده الناس مقدرتش تكدب عينيها ولا تتجاهل شكل الشقه والوضع اللي كانت عليه بعد الانفجار.. وبعد الحادث بفتره حصل ترميم وتجديد للشقه لكن اتقفلت تماما لفتره طويله.